heit bin e ned munta wuan         h. c. artmann

heit bin e ned munta wuan
wäu ma r unsa bendlua schdeeblim is..

heit bin e ned munta wuan
und i schlof
     und i schlof
          und i schlof
und draust da schnee foed ima mea
und de drossln dafrian und de finkn
und de aumschln und d daum aufm doch..
und dea schnee foed ima mea
und ea drad se
     und drad se
wia r a fareisz ringlgschbüü
und kumd ma bein fenzta r eine
mocht ma r en bagetbon gaunz weiss fua mein bet
wiad hecha r und hecha fua mein bet
und schdet do und schaud me au
wia r a engl med ana koedn haund ..
und i schlof
     und i schlof
          und i schlof ..

heit bin e ned munta wuan
de bendlua schded no ima
und dea schneeane engl schdet doo
und schaud me au wia r e so ausgschdregta doolig
und mei schlof is scho soo diaf
das ma glaaweis und launxaum
winzege schdeandaln aus eis
en de aungbram
zun woxn aufaungan ...

H.C.Artmann (1921 – 2000), med ana schwoazzn dintn, Salzburg 1958, S.87.